最被低估嘅影帝級演員 張學友生日快樂！ 重溫5大歌神電影力作
電影LOL 2018年7月10日 下午1:47

張學友等如四大天王、等如歌神、等如好男人，最近仲做埋罪犯剋星，內地開親演唱會都拉到通緝犯。冒住被拉嘅危險都要去睇演唱會，可見歌神魅力沒法擋。

歌唱事業實在大厲害，歌藝蓋過歌神一樣咁出色嘅演技，從影多年來代表作無數而且戲路甚廣。趁今日係張學友嘅生日，我地一齊來個電影小回顧：

好演得《旺角卡門》

1988年嘅《旺角卡門》，王家衛導演處女作，主演劉德華、張曼玉同張學友都仲係上位中影壇新生代，不過初生之犢不畏虎，張學友飾演火爆又衝動的古惑仔烏蠅就為佢贏得不少好評，仲獲得香港金像獎最佳男配角。當中烏蠅的台詞「食屎啦你！」、「我烏蠅寧願做一日英雄，都唔想做一世烏蠅！」，到而家都成日被cap圖。呢啲咁粗嘅對白同為人斯文、非常佛系嘅張學友，真係好大對比。

扮嘢得又打得《鼠胆龍威》

以為只有梁朝偉先係王家衛御用男星？數下數下張學友都拍咗《旺角卡門》、《阿飛正傳》、《東邪西毒》三套，但佢唔止拍呢種類型戲，拍喜劇一樣咁拿手。1995年上映、由王晶執導嘅動作喜劇《鼠胆龍威》，夥拍李連杰做一個叫龍威嘅電影巨星，成套片好出力咁向《虎膽龍威》（Die Hard)借鏡，張學友個角色擺明車馬影射影壇大哥！個角色咸濕又縮骨，扮李小龍仲唔夠，真係要打得兩下，一樣似模似樣！

搞笑一樣得《金雞2》

做老土長氣有點豬但鍾意錢嘅表哥馮仁坤，幾廿歲人由後生廿歲仔演起，完全無違和感仲幾萌下。阿坤成日嘻嘻嘅高頻笑聲真係一流，仲獲得香港金像獎最佳男主角提名。

歌舞片實得《如果．愛》

歌神有連開42場《雪狼湖》音樂劇場場唱live嘅經驗，拍陳可辛執導歌舞片《如果．愛》唔會難到佢，同名主題曲獲得香港電影金像獎最佳原創歌曲，張學友飾演大師級導演聶文，成為演員兼情人嘅孫納（周迅飾）上位踏腳石。值得一提係華語影壇近年甚少歌舞片，《如果．愛》之後係咪得返……周杰倫嘅《天台》？

文藝片一定得《暗色天堂》

近年減產嘅學友一出手就幾乎有提名，最近作品《暗色天堂》係繼《男人四十》後再度與林嘉欣合作。由袁劍偉執導、改編自莊梅岩舞台劇《法吻》，張學友飾演牧師，一次熱吻後被告性騷擾，上演人言可畏嘅羅生門故事。今次唔搞笑好認真嘅張學友，獲提名香港金像獎及台灣金馬獎最佳男主角，可算係學友最接近影帝嘅一次。