學友明年初回歸香港衝200大關賺兩億
東方日報 OrientalDaily 2018年4月3日 上午5:45

巡唱的台前幕後心情興奮，仲瞓地砌出「147」字樣賀歌神！

歌神張學友的世界巡演前晚完成第147場，再次刷新其個人締造的紀錄，寫下全球華人歌手威水史！他更選定明年初以香港紅館作為是次巡演的最終站，勢必向200場大關邁進，憑其殿堂級身價，估計是次巡演將為他帶來2億港元進帳！

張學友《A Classic Tour學友．經典世界巡迴演唱會》於2016年10月在北京揭開序幕，目前仍進行得如火如荼，前晚他在浙江紹興市舉行第147場巡唱，刷新自己保持的紀錄，並再次創下華人歌手新紀錄，勢向200場衝刺！學友的巡演暫時排到6月底瀋陽站，大概會去到160幾場，以其神級身價，保守估計100萬一場，盛傳今次巡演將為他帶來2億進帳！

前晚學友面對坐滿會場的3萬名歌迷，在台上分享心情：「今天是非常特別的一天，開場前一直叫自己不要緊張，但一想到今天是破紀錄的一天就很緊張……」破紀錄之夜，同時亦是其好友「哥哥」張國榮離世15周年紀念，學友特別獻唱哥哥的經典作《風繼續吹》悼念摯友，並感性地說：「希望大家能記住張國榮。」

展望有人再創高峰

對於再創華人歌手新紀碌，學友始終保持初心：「並非為咗打破紀錄而唱。」而昨晨他由紹興返港，有十多名歌迷專誠接機，談到再一次打破自身保持的紀錄，他竟有點怕醜，笑說：「係，唔經唔覺。（好短時間就破咗！）都OK，都冇乜特別諗，覺得過得好快啫，做緊嘢就會過得快。（體力OK？）依家舒服過開頭做，因為始終做熟咗。（冇人破到你紀錄？）哈哈！紀錄呢啲嘢，係用嚟講o架啫！」他深信將來一定有人能打破其紀錄，笑說：「實有嘅……應該，係冇問題，因為市場同以前唔同咗，依家同上次都差好遠，去番同一個地方，你會覺得成個地方唔同咗，好似經濟呀，依家內地發展係好咗同快咗好多。」

贊成「實名制」抗黃牛

本報收到消息指學友將於明年1月再登紅館舞台，選定該處為是次巡唱的終點站，對此學友表示：「應該係，申請咗，我唔知攞到未，我都想喺香港完。（香港後唔會再加場？）冇得一路做落去，始終都要完o架！（一路唱囉？）可以繼續唱，咪唱第二啲嘢嘛，唔通唱一樣嘢唱咁耐！」學友每次開騷都掀起搶飛熱，演唱會門票甚至被炒至過萬元一張，對於有人建議以實名制售票，他極力贊成：「我覺得實名制冇乜壞，好呀！因為有陣時見到自己啲飛炒賣到好貴、好貴，都覺得唔舒服，所以我贊成實名制。」

文：音樂組

攝：張福宏

學友打破由他創下的巡唱紀錄，唱完第147場！


學友昨日返港，見到歌迷即揮手打招呼。