畀張學友爆狂練潑酒戲　林嘉欣尷尬傻笑
03月22日(二) 20:09

學友同林嘉欣勁熟。

【on.cc東網專訊】 「影后」林嘉欣、張學友、黃秋生、羅蘭、湯怡、陳家樂及麥子樂等，出席英皇電影《暗色天堂》首映禮。期間嘉欣及學友於台上大談拍戲點滴，嘉欣指學友十分適合戲中角色，因為該角色要有魅力，但不需要太靚仔。若該演員太靚仔的話，就會演得有包袱。學友聞言笑說：「我覺得我包袱好重喎！」學友表示戲中要背好多對白，故冇時間與嘉欣對戲。而嘉欣就稱與學友拍檔舒服得來又有驚喜，因為自己不會知道對方如何演，所以每日都有驚喜。

互相交流湊仔經
問到二人會否邀請家人睇戲？學友笑言其太太及女兒們不會到場：「樣樣（指邀請的人）有啲，不過我少啲囉！（太太同囡囡會否嚟？）唔會，我平時做嘢（佢哋）都少嚟。」學友笑言不會另外抽時間與太太睇戲，因為該片爭議性大，故費事解釋太多。問到學友是否怕被女兒質問？他笑說：「大個喇！我依家反而想佢問多啲都唔問，細女就成日問埋啲無謂嘢。（有冇同嘉欣交流湊仔心得？）方法都有分別，嘉欣平時會嚴厲啲。」

學友爆林嘉欣搵副導演練潑酒戲，仲學足佢嘅表情。

唔驚囡囡有男友
嘉欣聞言就透露曾上堂學育兒：「我前年學育兒課。（上完堂同囡囡嚴厲啲？）其實小朋友係個體，上完堂覺得好有用，令小朋友知道有責任，從中了解價值觀。」談到該育兒課程適用2至12歲的兒童，學友打趣說：「我個女過咗歲數，唔知啱唔啱用呢？」嘉欣就向學友教路：「其實去到12歲你就要尊重佢。」學友即開玩笑自嘲不獲女兒尊重：「我不嬲都尊重佢，係佢唔尊重我咋嘛！」提到早前學友大女被拍得與同學去街，學友說：「佢嗰日同同學出去啫！（囡囡帶男友返嚟？）冇男友。（驚唔驚有？）唔驚，邊度驚得嚟嘅啫！」

爆嘉欣孖老公拍戲感開心
談到該片的預告片中有一幕嘉欣拿酒潑向學友，令對方頓時滿面紅酒，學友即爆料笑指嘉欣連潑酒都要練習：「我都未見過啲人連潑酒都要練。佢初初拍嗰陣要潑我，點知潑咗去膊頭位，塊面同衫碰到少少。」他更指嘉欣找來副導演練潑酒：「副導演問『得未呀嘉欣，得未呀嘉欣』。」嘉欣在旁尷尬狂笑。問到嘉欣與導演老公袁劍豪合作有何感覺？學友即搶答：「正囉，開心！」嘉欣則表示老公是位嚴謹的人。問她有否被對方鬧？嘉欣說：「會討論囉，唔係鬧。」

學友表情多多。












袁劍偉與林嘉欣夫妻檔宣傳新片。

此新聞影片 :  http://www.jackyclub.com/thread-16458-1-1.html