【新戲老公做導演】林嘉欣要玩色誘 學友：我唔會理佢老公

（攝影:仇志德）(蘋果日報)

張學友同林嘉欣相隔13年再合作拍新戲《暗色天堂》，並由嘉欣老公袁劍偉首次執導夫妻檔合作，今日於數碼港開鏡，問學友13年後再同嘉欣合作有乜感覺？佢話:「熟啲囉，拍《男人四十》有少少帶新人，o依家畀佢帶番我。」嘉欣就話：「同佢合作好舒服，因為熟，所以好放心，冇我嘅戲都嚟現場睇。」記者笑佢係咪嚟睇老公？嘉欣話：「唔係。」

據知戲裏面嘉欣會色誘學友，學友話：「唔可以咁講，兩個有可能發展，最後變決裂。」係咪身為導演嘅嘉欣老公，唔想你哋有親熱戲？學友笑住話：「我懷疑有啲關係，佢係編劇之一，親熱戲點到即止，唔會超越MV界線。」會唔會尷尬？佢話：「我唔會理佢老公。」嘉欣就話：「唔尷尬。」有冇諗過唔拍？嘉欣話：「唔會，劇本啱學友，我求佢幾次。」學友話：「之前我搵佢拍MV，佢搵我拍戲。」嘉欣即話：「好抵。」

問兩公婆合作拍戲會唔會有拗撬？嘉欣話完全冇，學友仲踢爆佢哋喺現場互叫爸爸媽媽㖭。

同場嘅衛詩雅話：「學友喺戲裏面做牧師，自己做基督教徒，戲裏戲外都生擒佢，戲內暗戀，戲外偶像，不停偷師。」問兩人有冇親熱戲？詩雅笑話：「我都想，不過冇，導演嫌我煩加對白。」  

此新聞相關影片請點：http://www.jackyclub.com/thread-16268-1-1.html