祖兒從學友身上感受父愛
文匯報   [2015-05-09]

香港文匯報訊 容祖兒（Joey）早前作客TVB娛樂新聞台節目《StarTalk》接受主播許文軒專訪，大談新碟製作趣事及其愛情觀。
新唱片由黃偉文包辦構思及美指，以西方結婚習俗作為題材，問到Joey何時真是出嫁？她說：「未諗，不過每個人都會有呢一日，自己的計劃未去到呢日，（有冇人催婚？） 得歌迷同傳媒催。對我來講，結婚係為咗生BB，如果唔係生BB，咁可以一直拍拖拍落去。咁我都鍾意小朋友，（咁幾時去生？）遲啲先算！」Joey又說：「我寧願旅行結婚都唔擺酒，因為好煩，好似做個騷咁，要同唔同部門溝通，所以想簡單啲，或者我會結咗婚先公布畀大家知。」

提到Joey的天后地位，問到有否擔心給另一半壓力，她說：「兩個人相處唔會畀呢樣嘢束縛住，只係外界太多標籤，（佢有冇Hard Feeling？）我諗冇，其實我都唔係好王者，我鏡頭後都好小女人。」

被游說別再參加頒獎禮

另外，Joey表示為了新唱片做了很多聯絡的工作，她要親自邀請馮寶寶和張學友拍攝MV及邀請五輪真弓作曲，其中五輪真弓因聽過自己的《心淡》才答應為她寫歌。而跟學友拍MV更令自己緊張到「反櫈」，Joey亦把握時間同偶像傾偈，問到同學友傾什麼？Joey說：「問佢同囡囡啲嘢，因為我自小缺乏父愛，佢係好爸爸，所以想感受下父愛。佢仲叫我唔好再參加以後的頒獎禮，學友講嘢好有說服力，佢話現在頒獎禮唔似以前，比較有娛樂性，當時真係搞到我想唔再參加，（現在決定參唔參加？）太多顧慮，好多人要交代，所以未決定，五月仲早啦！」

Joey表示上年媽咪及自己的身體出現毛病，令她學會珍惜，她說：「對我來講工作永遠是No.1，但生活也要顧及多些，愛多啲身邊的人。以前真係難抽時間陪家人，現在每日和媽咪要有好多聯絡和通訊。」