兄弟幫 張學友 張家輝        
都市日報 2015年04月10日



近年張家輝又做導演又做演員，每次為電影宣傳他總有與別不同的話題，今次是家輝首次跟他聲稱是異父異母的「親兄弟」張學友合作，在新片《赤道》中，家輝是警察，學友是物理學家，兩人是有勇有謀的好拍檔，但戲外兩兄弟就互窒冇面畀。其實各大導演們，應該找這兩兄弟拍笑片，與眾樂樂齊開心！

撰文：羅婉玲｜攝影：Eddy、韓成｜美術：Ronnie Cheung

大家好懷疑為何《赤道》是張氏兩兄弟首次合作，學友解釋說：「其實首次合作係呢一部，之後先至拍《失戀急讓》，不過《失》片舊年上先。」去年家輝在內地一個訪問節目中，開玩笑說學友是他的親兄弟，還表示查過族譜是N咁多代的同姓兄弟，是真是假不重要，反正對着這兩兄弟，認真便輸了，家輝笑謂：「我哋較早前相認咗，我就係唔想靠阿哥（指學友）嘅名氣。」學友忍不住說：「你又講一次。」家輝抵死話：「其實大家都知我有苦衷。」說罷大家哈哈大笑一番。

互窒冇面畀

談到兩兄弟合作，學友望住家輝話：「佢好認真，因為相當認真先至可以攞影帝。」家輝即說：「但我覺得你好嬉戲，哈哈！」學友回敬道：「我係遊戲人間。」此時家輝又認真話：「有次有句對白，佢對自己要求好高，不過高完一陣，佢又唱番兩句歌。」其實兩人在戲中，要面對一班恐怖分子，學友是物理學家，但卻沒有像神探伽利略般不時拋出物理學方程式，學友笑言：「呢方面我哋唔做，都拍過，我哋梗係創新啲。（如何知道你係物理學家？）我有副眼鏡，有啲鬍鬚，着件冷衫就係啦，但係呢套戲好認真，唔係搞笑㗎。」學友一本正經的形容，效果竟然更搞笑。

忽然玩踢爆

至於戲中演警察的家輝，總離不開動作場面，學友謂：「佢打得多啲，我少啲，呢啲係睇年齡，我大佢少少，所以係最少（動作場面），佢就僅次於我，跟住就係樂仔（余文樂）、崔始源，愈後生就打得愈多愈金，導演體諒我哋。」但家輝不同意說：「唔係喎，導演叫我拍時，同我講話有套戲唔使打，仲有阿哥拍，咁就掂啦，跟住又話打少少，畀導演過咗一棟！」學友取笑他：「都係激戰吓啫！家輝就好用力拍，我就要輕鬆啲。」

不過家輝不甘示弱玩踢爆，他說：「阿哥用力你哋睇唔到，佢成日都幫啲新導演，人哋唔夠錢就畀錢，冇投資者就畀埋錢，畀錢人哋拍，仲唔收錢自己拍埋，佢成日都係咁。」學友只好笑謂：「唔係邊有人搵我拍戲，我好少拍嘛。（這部戲有沒有投資埋一份？）呢部梗係唔使啦，班老闆咁叠水。」兩兄弟果然好了解大家。

觀看影片請至：http://www.jackyclub.com/thread-16148-1-1.html

▲家輝與學友首次合作拍電影。