蘋果日報 2015年02月06日
被封做「歌神」後會點？
學友：唔識得調整心態係唱唔到....

（右圖為KKBOX訪問截圖）

歌神張學友近日為新國語專輯《醒着做夢》宣傳，近日佢接受KKBOX專訪，學友坦言呢張專輯最大難題係搵歌，佢話有啲歌聽落要有時間性，又指自己始終係一個流行歌手，當然希望首歌會流行，佢喺訪問中表示：「如果首歌係Jazz，要介紹畀大家聽，都要有流行元素，啲人先容易接受呢樣嘢。」

學友又謂歌曲要流行，要睇天時﹑地利﹑人和，而佢係歌唱比賽出身，一出道已經要同呂方比較，之後又要同四大天王比，佢話：「一陣又呢啲，又叫我歌神，一陣又叫我乜嘢，你自己如果唔識得去調整心態，其實都唱唔到，因為冇辦法，點做落去？你可以點樣，你跟住又點？你信咗自己係歌神後，咁點算呀？你跟住做乜嘢？我點樣做？下一隻碟點做？你一定要從自己心理或者狀態，去平衡自己點樣繼續做。」

學友又認為一隻碟好唔唔好賣，未必同放咗幾多錢去做有直接關係，佢解釋：「因為做得好唔好，係基本條件，同錢唔係一定有直接關係，當然你話錢多啲，我哋會搵到較好Player﹑好啲Mixing﹑好啲Mastering，佢係會有分別，但係如果我冇錢去做，係咪會死呢？我自己覺得，只要你真係有心做，佢都係會好聽，一樣聽得出。」

觀看影片請點：http://www.jackyclub.com/thread-16062-1-1.html