【忽周即時】30周年演唱會告吹
學友直認搵少咗：今年冇乜收入
蘋果日報 建立時間: 0112 17:29

學友同陳淑芬合作20年都冇簽約，去年尾兩人鬧翻後，學友話：「依家有唔少客戶直接聯絡我，我就叫佢哋搵番唱片公司傾。」

今日張學友為宣傳國語新碟〈醒著做夢〉到商台接受《1圈圈》訪問，入行30年嘅學友被記者問到公司有冇頒金牌獎勵，佢笑稱：「阿倫喺度頂住，冇辦法，阿倫40年，同佢差咁遠，我都唔好意思講。(有冇打亂咗你30周年計劃？)其實我冇30周年嘅計劃，真係冇 (你唔覺有紀念性咩？)咁點解31周年唔可以慶祝呢？咁31係咪勁過30吖！大家好似想當然30年就一定要做，所以今年先咁多話我做演唱會，呢個唔係必然。加上阿倫做咗40年，你自己嗌30年幾肉酸呢？」

擺埋阿倫上台，歌神原來唱歌叻，回應都好叻。

雖然佢口口聲聲話30周年唔大搞，但去年陳淑芬已為學友入紙紅館申請4月開騷，不過有傳佢哋因財反目，30周年開唔成，學友今日都直認搵少咗，「係㗎！今年都冇乜收入，都係蝕㗎！不過都唔使跑數，接多幾個廣告就得。」雖然學友講到明今年唔開演唱會，但31周年就會慶祝，即係個騷押後出年開喇！

早前黃秋生彈樂壇新人唔得，對此學友搞笑咁話：「佢都係樂壇新人，樂壇新人彈番樂壇新人咁奇怪嘅。」而學友仲點名讚樂壇新人馮允謙同許廷鏗，「馮允謙唱R&B唱得幾好，許廷鏗都幾實正。」

觀看影片請點：http://www.jackyclub.com/thread-15989-1-1.html

今年學友唔會喺香港開30周年演唱會，佢話如果有任何佢嘅演唱會都一定係假嘅，學友迷留意喇！