【邊個報大數？】合作廿載 張學友、陳淑芬傳關係決裂
蘋果日報 0103 16:49

幾乎每年哥哥張國榮離世的紀念日，其生前經理人陳淑芬總是出心出力為之舉行形形式式紀念活動。2013年，即哥哥離世十周年，紀念活動更是一浪接一浪，及後就有報道指陳淑芬勁賺二千萬。之後陳淑芬回應時表示收益會一如以往，扣除開支，撥作慈善用途，但之後又改口稱：「我講明係商業活動，冇講過係慈善show。」

今日有周刊報道，話張學友同陳淑芬關係決裂，就連學友原定今年四五月於紅館舉行嘅入行三十周年巡迴騷首站，最後學友都親自取消。據悉今次係陳淑芬入紙申請嘅。

學友同陳淑芬合作近二十年，第一次合作就係95至96年學友世界巡迴演唱會，另一大型合作就係97年合共41場嘅《雪狼湖》。本來一直合作無間，何以忽然反目？報道引述消息人士話，學友有感於有人條數目有啲亂，而且亦賺得太盡，故關係決裂。

1.嗌大條數
報道話，每次於內地舉行巡迴騷，陳淑芬嘅做法都係判俾當地製作公司承包。但有人往往就嗌大條數，本來應該叫價五百萬，有人就開到七百萬，結果就要減低製作質素，或者賣多好多張飛去就番條數，令學友頗有微言。

2.分成問題
有指學友每次同陳淑芬拆帳，都係陳淑芬佔大份，學友就細份啲。今次學友舉行三十周年演唱會，就同陳淑芬傾傾希望可以提高拆帳比率，但傾唔成。

3.製作水準
報道仲話，學友一向對自己要求極高，內地巡迴騷亦一樣要求製作單位具備一流水準，但有人未能乎合學友要求，報道又引述消息人士指，有人喺樂隊方面「俾唔足」，直接影響演出水準。

傳聞就係咁啦，陳淑芬只簡單回應謂「冇嘢澄清」，又著記者問番學友：學友所屬嘅環球唱片方面就表示，今年4月嘅檔期係由陳淑芬預訂，學友希望有更多時間來準備一個高質素嘅演唱會；第二，陳淑芬唔係張學友嘅官方經理人，只係一直以友好關係協助張學友。兩者之間冇簽訂任何經理人合約；第三，環球唱片公司一直積極參與張學友嘅藝人管理工作。

究竟當中發生咩事呢？