蘋果日報 2014年01月12日
學友向非洲童送愛

■張學友坦言幸福和快樂絕非來自物質，希望透過演出令小朋友感受到遙遠的祝福。

由阿彌陀佛關懷中心（ACC）主辦的「香港愛世界慈善演唱會2014」，前晚在灣仔伊利沙伯體育館舉行，張學友、關淑怡、關楚耀、黃家強、李治廷及電影《狂舞派》演員楊樂文、林悅榮、古志鍵和朱天奇等演出。

學友打頭陣唱《Touch Of Love》和《真心的朋友》，再與非洲和本地的小朋友唱《愛是永恆》，他說：「打開報紙見到宣佈嗰啲幸福指數、快樂指數，覺得好奇怪，點解嗰啲比較先進，或者物質豐富嘅地方，譬如香港，如果唔係包尾嘅話，成日都喺好後？反而嗰啲根本唔識係啲乜嘢嘅地方，或者係啲明知物質冇咁豐富，但係佢哋幸福指數、快樂指數都排得好高，證明咗幸福同快樂絕對唔係嚟自物質。」三年前學友曾與非洲的小朋友演出，他笑說：「佢哋唔係當時嗰班小朋友，不過笑容都一樣，希望佢哋知道喺遙遠嘅地方，有好多哥哥姐姐好關心佢哋，希望佢哋每日都開心。」

甚少露面的關淑怡說：「都有欣賞過佢哋嘅演出，真係好有潛質，希望不斷會有呢啲活動，可以畀啲需要機會嘅人發揮潛能，每人都應該認同嘅，係咪？」即獲台下觀眾鼓掌支持。

家強讚揚曼德拉
在演唱會尾聲，眾人合唱Beyond的《光輝歲月》，家強說：「我覺得好幸運，有個機會幫到人。我同家駒一樣，同非洲好有緣份。」提到當地患愛滋病的孩子，家強說：「希望佢哋更加健康。」他又讚已故南非前總統曼德拉：「佢係一個偉人，如果喺古時嚟講，你可以當佢神咁拜，為人民付出好多，唔係為自己，而係為全世界，為人權同平等揭開新一頁，喺當年唔係咁多人做到，亦唔係咁多人諗到咁樣做。」
採訪、攝影：陳慧安