2013年10月03日 
【天王有say】張學友 抗衡無綫霸權第一人
建立時間: 1003 21:14(蘋果日報)

 
容祖兒早前就無綫藝人同歌手喺其他傳媒只可以用國語受訪，曾表示:「有時早起個腦塞晒車，講唔到國語，不過如果唔係，我呢10幾年嘅國語就唔會進步得咁快，焉知非福，將來可以講就講，做訪問就唔使咁煩，諗要講國語定廣東話，呢啲都係小問題，問題天天都多，有定案就會照做。」其後有網民搵番啲資料，發現祖兒多年前受訪，都係撐用國語接受其他傳媒訪問。如果無綫話「從未於合約條文中規限旗下藝人及歌手於其他傳媒以廣東話受訪」，咁祖兒呢咁多年來，是否多此一舉？

前文已提過，「歌神」張學友曾以廣東話接受亞視訪問，更開口指摘無綫對歌手不公平︰「唔好下下自己話晒事，話封殺邊個就邊個。」的而且確，學友早於90年代、即有線娛樂新聞台出現之前，已經因為接受他台訪問時用廣東話，而遭無綫封殺。

時光倒流至1991年，四大天王之一張學友，當時身繫無綫歌手合約，但仍亮相亞視嘅華東水災籌款活動，最後遭無綫封殺。可以話，學友係最早抗衡無綫霸權嘅歌手。

2010年1月，身為環球歌手嘅學友，明知公司同無綫就版稅問題仍然膠著，但仍冇有怕，邀請亞視和有線的代表出席其新碟《 Private Corner》記者會，更破天荒以廣東話接受亞視訪問，擺明剃無綫眼眉。片段於亞視新聞播出，蔚為奇觀。而當日無綫亦未有派員採訪。