發表者： jacky 於 2006-07-14 08:57:14 (359 人閱讀過)

            張學友痛罵狗仔隊   
2006-07-13

【本報香港訊】剛度過生日的張學友，竟被雜誌指他醉酒駕駛、失控箍頸、推記者頭部撞玻璃，學友12日大動肝火，痛罵狗仔隊攔車的做法有失專業操守，令他驚到毛管戙，不知對方是賊還是記者。

學友12日出席迪士尼樂園全新遊樂設施開幕典禮，他提起報導就火滾：「那日同陳太（陳淑芬）佢食完飯，我同太太車走，有人撲出影相，我好合作畀佢影，因為我搬屋，想多幾日安寧，諗住兜一陣就甩佢。」

可惜的是，學友擺脫不了跟蹤，還行錯路入了「掘頭巷」，他激氣的說：「佢塞住我架車，當時我覺得好奇怪，狗仔隊好少咁，太太即刻鎖車門報警，我落車走上前睇乜事，佢係咁影相，我一手車門，一手搶相機，相信係呢個時間有身體接觸，但我冇箍頸，亦冇造成任何傷害！」

後來警員到場按程序處理，但雜誌卻指警方偏幫學友，學友皺眉說：「報導影響我形象，有幾多人相信？但件事牽涉法律問題，第一，醉酒駕駛係嚴重罪行，我有飲紅酒，但冇醉，如果我飲醉會畀太太車；第二，妨礙司法公正係好大件事，雜誌唔可以亂寫。」

學友又說：「依家有傳媒冇晒底線，攔車對我講係好唔尋常、好驚一件事，成個人毛管都戙起！以前械劫案都係咁發生！我返屋企之後都有諗自己係咪做錯，可能我修為唔夠，係咪應該好似太太咁冷靜？但作為男人應該保護屋企人，我冇後悔自己所做！（會唔會退休？）香港娛樂圈環境，退唔退休唔係可惜，但歌迷支持自己咁耐，放棄自己工作係咪值得？退休好唔忿氣，我又唔係唔鍾意做、唔唱得！」

另外，身為迪士尼榮譽大使的學友，對於樂園備受批評表示：「香港迪士尼好似嬰兒咁，需要時間成長，我都玩過新遊戲，覺得好好玩。」




　張學友不滿狗仔隊攔車。