發表者： adaho 於 2004-04-02 06:56:51 (327 人閱讀過)

            【東方日報專訊】張學友花了三年心血製作的廣東碟《Life is like a dream》，將於本月二十日推出，這是第一張完全屬於學友自己的唱片，碟內十首歌曲都是學友作曲，每一首都代表學友對人對事的看法，其中《講妳知》送給太太羅美薇（May May）、《瑤瑤》送給愛女張瑤華、《給朋友》送給故友張國榮、梅艷芳、林振強、柯受良。



一句「係咩」行去

學友昨日接受港台「娛樂滿天星」訪問，他表示十首歌中旋律寫得最好的是《講妳知》，然而學友第一次寫歌給太太卻慘受無情打擊，他說：「《講妳知》靈感來源來自太太，佢成日同我講，談戀愛最開心係初相識的時間，佢話當年我打電話畀佢時成日：『哦、唔、』，因為我對住電話留言唔知講乜，但心裡面諗乜自己知，所以將當時的感覺寫出來。（May May聽完首歌有乜反應？）開頭佢冇乜反應，講一句『係咩？』就行去，好hurt，可能佢唔係我歌迷，冇咁興奮，直至昨日佢從收音機再聽到首歌，先同我講『幾好聽。』真係好彩；而《瑤瑤》我哼過畀囡囡聽，佢又係冇乜大反應，費事再hurt啦。」

《給朋友》送哥哥阿梅

至於《給朋友》由學友填讀白，他說：「呢首歌比較sad，當時其中一個朋友走了，首歌係寫當日發生的事，唱的時候好唔開心。（係咪寫畀阿梅？）哥哥又好，邊個都好，我覺得哥哥冇走過，當佢放假去旅行，咁睇會舒服點、正面點。（有冇同哥哥合作過？）電影有，唱歌唔多，其實我們諗住合作做音樂劇，我叫佢哥哥，因為佢真係好似大哥哥咁照顧你，畀人感覺好舒服。」學友還大讚哥哥的遺作《冤家》及陳淑芬悼念哥哥而寫的《煙花燙》很好聽。