台上跌倒惹恐慌 學友完騷親報平安：邊有咁大件事！
台上跌倒惹恐慌 學友完騷親報平安：邊有咁大件事！東網 08月14日(一)
「歌神」張學友前日（12日）於馬來西亞開騷時，有傳一度暈倒台上，之後再企起身繼續演唱，並自揭至細就有耳水不平衡，幾乎每年都會發一次，及有指學友演出前半小時，已經突然開始頭暈，令粉絲非常擔心。好在學友好快就已經回覆東網，直言自己唔係暈低，只係唔小心跌低咗一下，並非外傳咁大件事：「我冇嘢呀，不過就係耳水不平衡，今晚特別暈，觀眾又唔要退票，又唔介意我唔跳舞，咁咪唱埋佢囉。唱《只想一生跟你走》嗰陣，唔小心平地跌低一下啫，冇受傷，仲唱完成個演唱會，仲唱得幾好㖭！邊有暈低咁大件事呀！多謝你關心呀！好好休息啦！」
而其唱片公司亦急急回應東網，安撫粉絲緊張嘅心情：「請放心張生沒有在台上暈 ，只是平的舞台上滑倒 ，但立刻起身， 並完成全部演唱會。」網上亦有粉絲拍下當晚片段，見學友又唱又跳後氣都唔喘，雖然佢台上自爆有啲暈，不過都未有影響佢唱歌水準，更精靈講笑表示以後7、80歲開騷都唔再跳舞，要坐住演唱。
頁:
[1]