張學友自薦當練習對象 「渣渣輝」詐型：你笑過我好多次！
【普通話交談】張學友自薦當練習對象 「渣渣輝」詐型：你笑過我好多次！蘋果日報 0503 00:00
張家輝噚晚到九展出席其自導自演新片《低壓槽》首映，提到佢最新有個新朵叫「渣渣輝」，以作笑佢普通話唔好，家輝話：「我唔介意嘅，呢個朵好行喎！我睇過微博，知道個朵冇眨意，都好親切同好玩，不過我唔鼓吹，但大家叫得開心的話，我亦都阻止唔到。」到場撐佢嘅張學友就提議佢返去練習吓，或者佢哋之間對話時講多啲普通話，點知家輝話：「你都笑過我好多次啦！」
問到家輝會唔會的起心肝搵人教普通話？佢話：「我冇進步嘅空間嘅！其實好多香港藝人喺內地拍戲，都搵會北京人嚟配音，我當然樂意咁做啦！就算我講得一口流利嘅普通話，佢哋都唔會採用，因為佢哋有一套嘅標準，唔係對我有偏見，（咁係咪即係唔學？）我係忠於自己，比較反叛啲嘅。」
另外，同片嘅張可頤話：「原來我同家輝同三哥都一齊飾演過夫妻。」家輝聽到之後即刻望住三哥話：「咁我哋咪即係老襟？」可頤就話：「乜你咁dirty㗎……」
記者問到如果有得揀會揀邊個做老公？家輝又再次搶答：「反叛啲，會去7仔偷嘢嗰啲就搵我啦，要穩重就搵三哥。」三哥就話戲中男演員嘅造型全部都係家輝諗，家輝就話：「係呀，我今次想三哥做一個優雅嘅黑幫嘛。」
頁:
[1]