梁振英夫婦睇學友騷 唱完即閃驚啲咩？
【有圖】梁振英夫婦睇學友騷 唱完即閃驚啲咩？蘋果日報 更新: 1231 10:23
歌神張學友呢排喺紅館舉行演唱會，鍾楚紅、葉德嫻、吳婉芳、劉嘉玲、陳奕迅、楊千嬅同老公丁子高、張家輝同關詠荷夫婦、任達華、胡楓、何超蓮、何超雲、容祖兒、蔡卓妍、劉美君、吳業坤、周麗淇……排隊朝聖嘅藝人，幾隻手都數唔晒！然而，前晚觀眾席上卻出現咗一對夫婦，搞到網友㷫爆群起改歌詞唱。
事緣音樂人梁栢堅喺facebook貼咗特首梁振英夫婦現身紅館、兩人坐喺控制台下面嘅VIP位睇騷，梁栢堅仲藉住學友嘅歌曲諧音寸爆689兩公婆：「噚晚張學友：還是覺得你老母、每天插你多一些、愛摸蝦...餓狼傳說！」佢班網友亦熱烈留言：「時運低呀你。」、「我都睇咗噚晚嗰場，唱完佢即閃人。」、「搞乜咁慘時運低撞到污糟嘢！」
無論係梁栢堅定佢啲追隨者，一向都有個習慣，就係每次出事都鍾意改歌詞，今次又點會例外先？睇相都㷫爆嘅網友，紛紛加入改歌詞行列發洩：「怎麼你新聞表現X了，髮型又亂了，彷彿見曉明被換了，一覺知、心裡知不妙，這晚你去過那裡吧，與上海幫靜靜談著舊調。」、「狼在叫，獸與妖，面似坦率心在笑，雙手搶，尾巴搖，競向中央比折腰。」、「餓狼傳說，直頭唔使改詞。」
梁栢堅噚日接受《蘋果》電話訪問，佢話呢張相係朋友影嘅：「2016年走咗咁多人，咁見到嘅人都要珍惜吓，可能呢，唔知幾時會唔見啦，呢啲嘢，下話！」梁栢堅仲忍唔住出手改歌詞潤爆689：「即使你離開，有葉劉下海，這漫長夜裏，林鄭仲有鬼胎......」
不如同大家回味下個騷先。 （資料圖片）
頁:
[1]