學友再唱《家後》 歌聲融化600位粉絲
【顧家暖男】學友再唱《家後》歌聲融化600位粉絲蘋果日報 時間: 0822 19:00
張學友噚晚擔任完江蕙表演嘉賓後，今日同粉絲聚會。（台灣《蘋果》即時圖片）
歌神張學友噚晚喺台北小巨蛋，擔任台語天后江蕙（二姊）嘉賓，兩人仲合唱《家後》，而學友仲加碼獨唱《她來聽我的演唱會》，掀起高潮。
而學友今日延續歌神魅力，喺新莊頤品大飯店舉辦「友友粉絲會」，與歌迷互動，歌神甫見歌迷，就深情地說：「好久不見，只要大家好（我）就好。」短短一句話，就融化現場近600位歌迷。佢深情地唱出廣東歌 《天變地變情不變》，佢話：「這首歌的意義，很適合團結的我們、團結的氣氛。」
學友表現親民，工作人員仲笑言：「大家想聽學友叔叔、學友阿伯的什麼歌曲呀？」難得學友毫不在意，還自嘲：「我今天素顏而來耶！」歌迷大呼：「沒關係，只要你來！」佢又開玩笑表示：「不然我今天來唱《家後》好嗎？彌補昨天沒到小巨蛋看演唱會的歌迷。」讓現場粉絲瘋狂尖叫。
而學友喺粉絲會獻唱《我真的受傷了》，現場以結他伴奏，為咗回饋歌迷噚晚冇見到佢同二姊合體經典畫面，佢笑言：「今天二姊不在，主持人要不要暫時當一下二姊。」接着再唱《她來聽我的演唱會》、再唱《家後》，令歌迷開心不已。
另外，今日粉絲會守衞森嚴，歌迷出入都要配戴識別證，門口有2位保安人員維持秩序，進門後仲有工作人員仔細查驗識別證，先可以入內，就連歌迷去洗手間，都有時間規定，有歌迷去完toilet後返回現場，卻被鎖喺外面，工作人員話：「待會才會開放。」歌迷擔心見不到歌神，緊張地拍門。
頁:
[1]