【嘉賓王又嚟喇】邀請學友任個唱嘉賓 千嬅開心到喊
【嘉賓王又嚟喇】邀請學友任個唱嘉賓 千嬅開心到喊蘋果日報 建立時間: 0129 13:49
學友擔任千嬅個唱嘉賓，令千嬅開心流淚。
「楊千嬅 Let's Begin 世界巡迴演唱會2015」噚晚舉行第五場騷，蔡一智與老婆、導演泰迪羅賓與黃修平、鄭融及側田等捧場。
噚晚表演嘉賓係有「嘉賓王」之稱嘅「歌神」張學友，當學友出場時掀起高潮，佢獻唱經典金曲《還是覺得你最好》，全場大合唱，然後又同千嬅手拖手合唱國語歌《你最珍貴》。之後千嬅揚言：「我好緊張呀，我練咗呢首歌兩個月啦！」
學友笑佢緊張到手震，千嬅則爆料指老公丁子高係學友粉絲，佢話：「我老公仲緊張呀！(呢首歌其實係丁子高同千嬅唱，0依家我唱住先。)呢首歌對我哋好有意義，當年結婚時合唱表演！(點解唔叫我去唱?)唔敢呀！今日好多謝你，我覺得好amazing！」
過往四場騷都坐喺VIP席嘅丁子高，噚晚坐喺第一行，似乎為咗近距離欣賞老婆同偶像合唱。學友笑說：「其實我以前都以為千嬅傻傻哋......（我0依家都未好返，學友哥哥）但之前我搞咗阿梅個騷，咁多年來嗰次認識千嬅比較深，由開始打電話畀佢到做完個騷，叫佢做乜，佢都話『好呀』、『OK』。令我非常非常感動...(我應該嘅！)我覺得千嬅應該擁有一切最好，因為佢係個好人。」觀眾報以掌聲。
千嬅自爆不敢直接打電話邀請學友擔任個唱嘉賓，佢透過經理人林珊珊邀請，學友立即答應後，原本想佢將多首經典歌嘅串燒歌，但最後都係唔敢。到底邊個決定學友噚晚唱乜嘢歌呢？學友說：「我問嘉萍（千嬅演唱會監製）點解千嬅揀呢首歌？佢話：『係我揀0架！』」千嬅笑說：「係呀，娛樂圈好黑暗0架！其實我想聽學友唱新歌，但佢（嘉萍）話你成日都唱新歌，話你一定會想唱呢首，咁我都好鍾意！」學友坦言：「其實揀舊歌好呀，我一定識唱，唔使背歌詞！」全場爆笑。
然後千嬅感性地說：「我好開心，喺人生路上，有一晚可以同學友合唱，好多謝你完成我嘅夢想。」學友指千嬅好抵錫，叫歌迷用力愛錫她。
千嬅送學友離場後，說：「嘩，我今日好開心呀！當年我哋參加新秀，個個報名都唱學友嘅歌，我都揀咗《李香蘭》。今次演唱會我請嚟既嘉賓都係好朋友，係我尊敬和值得學習嘅人，學友哥哥係我嘅好榜樣，佢無論任何階段都做得好好，好值得學習。今日綵排時佢仲袋咗好多錢畀我，因為有啲位我唱得唔係咁好，佢即刻教我，係一位好老師。」
然後千嬅唱完《化》接受歌迷點唱，當佢唱《假如還我說下去》時突然哭起來，似乎學友出場令佢非常激動，工作人員立即遞上紙巾，情緒平伏後佢先繼續唱《姊妹》。
兩人合唱《你最珍貴》。
攬攬先﹗
觀看新聞影片請點：http://www.jackyclub.com/thread-16045-1-1.html
頁:
[1]